ພະແນກຊັບພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ປະຖະກະຖາ ເອກະສານມູນເຊື້ອວັນສຳຄັນຂອງຊາດ, ຂອງສາກົນ ແລະ ເປີດຂະບວນການ ແຂ່ງຂັນ 3 ດີ ຂອງສະຫະພັນແມ່ຍິງ ພຊສ

     

     ຕອນເຊົ້າ ຂອງວັນທີ 04 ສິງຫາ 2023 ຢູ່ທີ່ຫ້ອງປະຊຸມໃຫຍ່ ຂອງພະແນກຊັບພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ສະຫວັນນະເຂດ ໄດ້ຈັດຕັ້ງພິທິປະຖະກະຖາ ເອກະສານມູນເຊື້ອວັນສຳຄັນຂອງຊາດ ແລະ ຂອງສາກົນ ປະກອບດ້ວຍ ເອກະສານຄື: ວັນຜ່າວົງປິດລ້ອມ ຂອງກອງພັນທີ 2 ວິລະຊົນທີ່ທົງໃຫ້ຫີນ ຊຽງຂວາງ ຄອບຮອບ 64 ປີ (18 ພຶດສະພາ 1959-18 ພຶດສະພາ 2023),  ເອກະສານ ວິລະກຳໂຕນຄຸກ ຢ່າງມະຫັດສະຈັນ ຂອງບັນດາຜູ້ນຳ ຂອງພັກ, ແນວລາວສ້າງຊາດ ຄົບຮອບ 63 ປີ(24 ພຶດສະພາ 1959 -24 ພຶດສະພາ 2023), ເອກະສານ ວັນກຳມະກອນສາກົນ ຄົບຮອບ 137 ປີ (01 ພຶດສະພາ 1886 -01 ພຶດສະພາ 2023), ເອກະສານ ໄຊຊະນະບັ້ນຮົມ ດຽນບຽນຟູ ຄົບຮອບ 69 ປີ (07 ພຶດສະພາ 1945 -07 ພຶດສະພາ 2023), ເອກະສານ ວັນເກີດທ່ານປະທານ ໂຮ່ຈີ່ມິນ ຄົບຮອບ 133 ປີ (19 ພຶດສະພາ 1890 -19 ພຶດສະພາ 2023) ແລະ ເອກະສານ ມູນເຊື້ອການກຳເນີດ ແລະ ການເຕີບໃຫຍ່ ຂະຫຍາຍຕົວຂອງອົງການຈັດຕັ້ງ ສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 – 20 ກໍລະກົດ 2023. ​ພາຍໃຕ້ການເປັນປະທານ ແລະ ໃຫ້ກຽດເຜີຍແຜ່ໂດຍ ສະຫາຍ ພູທອນ ຍອດບຸນເຮືອງ ກຳມະການພັກແຂວງ ເລຂາຄະນະພັກຮາກຖານ, ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ມີຄະນະພັກຮາກຖານ, ຄະນະຂະແໜງ, ພະນັກງານ-ລັດຖະກອນ ແລະ ສະມາຊິກສະຫະພັນແມ່ຍິງຮາກຖານຮາກຖານ ພະແນກຊັບພະຍາກອນທຳມະຊາດ ແລະ  ສິ່ງແວດລ້ອມ ເຂົ້າຮ່ວມຈຳນວນ 62 ທ່ານ.

    ໃນໂອກາດດັ່ງກ່າວ,ທ່ານ ພູທອນ ຍອດບຸນເຮືອງ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຊສ ແຂວງ ໄດ້ຍົກໃຫ້ເຫັນເຖິງ ຄວາມໝາຍຄວາມສຳຄັນ ຂອງແຕ່ລະວັນປະຫວັດສາດ ຂ້າງເທິ່ງນີ້ ເຊັ່ນວ່າ : ການຜ່າວົງປິດລ້ອມ ຂອງກອງພັນທີ 2 ວິລະຊົນທົ່ງໄຫຫີນ ຊຽງຂວາງ ນັ້ນສ່ອງແສງໃຫ້ເຫັນວ່າການນໍາພາຂອງພັກຖືກຕ້ອງສະຫລາດສ່ອງໃສ, ຂະບວນການຕໍ່ສູ້ ຂອງພວກ ເຮົາແມ່ນເປັນທໍາ. ສະນັ້ນ ການຜ່າວົງປິດລ້ອມຂອງກອງພັນທີ 2 ໄດ້ຢັ້ງຢືນໃຫ້ເຫັນຢ່າງຈະແຈ້ງວ່າ: " ສິນທຳຍາມໃດ ກໍ່ຊະນະອະທໍາ ". ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງ ຂອງກໍາລັງປະກອບອາວຸດ ເຮົາທີ່ຢູ່ໃຕ້ການນໍາພາຂອງພັກ, ເປັນເຫດການປະຫວັດສາດອັນສໍາຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລໍ້າຄ່າທີ່ສຸດໃຫ້ແກ່ຂະບວນຕໍ່ສູ້ຂອງກອງທັບ ແລະ ປະຊາຊົນເຮົາຍາດເອົາໄຊຊະນະ ໃນໄລຍະຕໍ່ມາ, ຄະນະພັກ  ຄະນະບັນຊາ, ພະນັກງານ  ສະມາຊິກພັກຕະຫຼອດນັກຮົບທຸກຄົນໃນກອງພັນທີ 2 ໄດ້ເສີມ ຂະຫຍາຍມູນເຊື້ອຕໍ່ສູ້ບໍ່ຍອມຈໍານົນຂອງບັນພະບູລຸດ ແລະ ປະຊາຊົນລາວ ຜູ້ຮັກຊາດ ສາມາດທັບມ້າງກົນອຸບາຍຂອງພວກຈັກກະພັດ ແລະ ລູກແຫຼ່ງຕີນມືຂອງພວກເຂົາທີ່ຫວັງດັບມອດກໍາລັງປະຕິວັດ, ໂດຍສະເພາະແມ່ນ 2 ກອງພັນທີ່ເຂົ້າຮ່ວມກັບກອງທັບແຫ່ງຊາດ ນັ້ນຟັງທະລາຍລົງ ແລະ ຍັງສະແດງໃຫ້ເຫັນເຖິງຄວາມບໍລິສຸດຜຸດຜ່ອງ, ຄວາມຈົງຮັກພັກດີ, ຄວາມສາມັກຄີເປັນຈິດຫນຶ່ງ ໃຈດຽວ, ຄວາມອົດທົນຫມັ້ນຫນຽວບໍ່ຄອນແຄນຕໍ່ການນາບຂູ່, ຫລອກລວງຂອງສັດຕູ. ນໍ້າໃຈສູ້ຮົບພິລະອາດ ຫານ ແລະ ມີໄຫວພິບຂອງ ກອງພັນທີ 2 ໄດ້ເປັນແວ່ນແຍງ, ເປັນການປຸກລະດົມອັນແຮງກ້າໃຫ້ແກ່ຂະບວນ ການປະຕິວັດ ເພື່ອຕີເອົາຊະນະກັບຈັກກະພັດອາເມລິກາ ແລະ ລູກແຫຼ່ງຕີນມື, ພ້ອມດຽວກັນນັ້ນກໍ່ເຮັດໃຫ້ກຳລັງປະຕິວັດ, ໂດຍສະເພາະແມ່ນກໍາລັງປະກອບອາວຸດປະຊາຊົນ ນັບມື້ເຕີບໃຫຍ່ຂະຫຍາຍຕົວ ແລະ ເຂັ້ມແຂງ, ເຮັດໃຫ້ຊື່ສຽງອິທິພົນຂອງກໍາລັງຝ່າຍປະເທດລາວ ( ແນວລາວຮັກຊາດ ) ນັບມື້ພົ້ນເດັ່ນຂຶ້ນໃນ  ເວທີສາກົນ, ປັດໄຈພື້ນຖານທີ່ເຮັດໃຫ້ກອງພັນທີ 2 ສາມາດຜ່າວົງປິດລ້ອມຢ່າງມີໄຊ ຍ້ອນມີການນໍາພາອັນຖືກຕ້ອງ ສະຫຼາດສ່ອງໃສ ຂອງພັກປະຊາຊົນປະຕິວັດລາວ; ເຫດການໂຕນຄຸກຢ່າງມະຫັດສະຈັນ ຂອງບັນດາຜູ້ນໍາໄປສູ່ເຂດທີ່ຫມັ້ນປະຕິວັດ ຢ່າງປອດໄພ ນັ້ນຍ້ອນການນໍາພາ ອັນສະຫລາດສ່ອງໃສ ແລະ ປີຊາສາມາດຂອງປະທານ ໄກສອນ ພົມວິຫານ ແລະ ສູນກາງພັກ, ການຊີ້ນໍາລະອຽດຕົວຈິງຂອງທ່ານ ສາລີ ວົງຄໍາຊາວ, ຄະນະພັກແຂວງ ແຂວງວຽງຈັນ ທີ່ໄດ້ກະກຽມຢູ່ທາງນອກ ແລະ ທາງໃນ, ຍ້ອນນໍ້າໃຈຮັກຊາດອັນແຮງກ້າ ຂອງບັນດາຜູ້ນໍາເຮົາທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫລະ ມີຄວາມປີຊາສາມາດຂົນຂວາຍ, ສຶກສາອົບຮົມສາລະວັດທະຫານ, ເຮັດໃຫ້ສັດຕູກາຍເປັນ ມິດ ສະຫາຍຮ່ວມຕາຍນໍາກັນ, ຍ້ອນສາລະວັດທະຫານມີນໍ້າໃຈຮັກຊາດອັນດູດດື່ມ, ເບື່ອຫນ່າຍຕໍ່ອໍານາດປົກຄອງຫຸ່ນປະຕິການ. ເຂົາເຈົ້າ ມີຄວາມຈົ່ງຮັກພັກດີ, ຊື່ສັດຕໍ່ຜົນສຸດຂີດກາຍເປັນຜູ້ໄຂປະຕູຫ້ອງຄຸມຂັງ ແຕ່ລະຫ້ອງ ແລະ ໄຂປະຕູຄຸກແລ້ວປ້ອງກັນ ແລະ ພາທາງຜູ້ນໍາພັກ ແລະ ແນວລາວຮັກຊາດຍ່າງອອກຈາກຄຸກໂພນເຄັງ ອອກໄປຢ່າງ ປອດໄພ, ຍ້ອນຄວາມຕື່ນຕົວຮັກຊາດຂອງປະຊາຊົນ, ທຸກຊັ້ນຄົນ, ນັບທັງພະສົງ... ໃນນະຄອນຫລວງວຽງຈັນ ແລະ ທົ່ວປະເທດ ໂດຍການປຸກລະດົມຂົນຂວາຍຈາກກອງຫນູນ ກໍາລັງປະຕິວັດ, ມີຄວາມຕື່ນຕົວດໍາເນີນການຕໍ່ສູ້ເລັ່ງທວງໃຫ້ພວກປະຕິການປ່ອຍຜູ້ນໍາ, ເມື່ອຜູ້ນໍາໂຕນອອກຈາກຄຸກ ເຂົາເຈົ້າກໍ່ຮັກສາຄວາມລັບ, ປ້ອງກັນ ແລະ ລ້ຽງດູຜູ້ນໍາ, ຍ້ອນໄດ້ມີເຄື່ອນໄຫວປຸກລະດົມ ປະຊາຊົນດໍາເນີນການຕໍ່ສູ້ຢ່າງແຂງແຮງ, ການເຄື່ອນໄຫວຂອງຜູ້ຊົງຄຸນວຸດທິ, ຜູ້ຮັກຫອມສັນຕິພາບເປັນກາງທີ່ໄດ້ສະຫນັບສະຫນູນຝ່າຍແນວ ລາວຣັກຊາດ, ຕໍ່ສູ້ປ້ອງກັນຜູ້ນ, ຫາວິທີບໍ່ໃຫ້ນໍາເອົາຜູ້ອອກຕັດສິນ, ຍ້ອນກໍາລັງຝ່າຍປະເທດລາວ, ກອງພັນທີ 2 ແລະ ທະຫານທ້ອງຖິ່ນທີ່ປ້ອງກັນຜູ້ນໍາ ແລະ ກຽມ ພ້ອມທັບມ້າງທຸກການໄລ່ລ່າຂອງສັດຕູ, ເປັນຜູ້ພາທາງທີ່ກໍານົດໄວ້ກ່ອນ ເພື່ອໃຫ້ຜູ້ນໍາອອກໄປສູ່ທ້ອງຖິ່ນຕ່າງໆ, ຍ້ອນການສະຫນັບສະໜູນຂອງພັກ, ລັດ ແລະ ປະຊາຊົນຫວຽດນາມ ແລະ ປະເທດສັງຄົມນິຍົມອ້າຍ ນ້ອງ, ນັບທັງອົງການສະຫະປະຊາຊາດ ທີ່ໄດ້ແຕ່ງຜູ້ແທນມາພົບກັບລັດຖະບານຫຸ່ນ ແລະ ກົດດັນໃຫ້ພວກ ປະຕິການຕ້ອງຮັບປະກັນຊີວິດໃຫ້ແກ່ຜູ້ນໍາທັງຫມົດ; ຄວາມໝາຍສຳຄັນ ຂອງໄຊຊະນະດຽນບຽນຟູ  ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ ແຕ່ຍັງແມ່ນໂຊຊະນະ ຂອງປະຊາຊົນລາວ ແລະ ປະຊາຊົນກໍາປູເຈຍ ທີ່ໄດ້ຮ່ວມສໍາພັນສູ້ຮົບ, ຮ່ວມຂຸມຄອງຕ້ານກັບສັດຕູໂຕດຽວກັນ ເພື່ອປົດປ່ອຍຕົນເອງ ໄຊຊະນະດັ່ງກ່າວໄດ້ດັບມອດເຈດຈໍານົງ ແລະ ການຮຸກຮານຂອງລັດທິລ່າເມືອງຂຶ້ນ ແບບເກົ່າ, ບັງຄັບໃຫ້ລັດຖະບານຝຣັ່ງຈໍາຕ້ອງຍອມເຊັນສັນຍາເຊີແນວກ່ຽວກັບອິນດູຈີນ, ຮັບຮູ້ຄວາມເປັນ ເອກະລາດແຫ່ງຊາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ. ພາກເຫນືອຫວຽດນາມ ໄດ້ຮັບການປົດປ່ອຍຢ່າງສົມບູນ ແລະ ກາຍເປັນຖານທີ່ຫມັ້ນຂອງການປະຕິວັດທີ່ ເຂັ້ມແຂງທັງເປັນແນວຫລັງທີ່ແຫນ້ນແກ່ນ ໃຫ້ແກ່ການດໍາເນີນການຕໍ່ສູ້ຕ້ານຈັກກະພັດອາເມລິກາຢູ່ພາກໃຕ້ ຫວຽດນາມ, ໄຊຊະນະດຽນບຽນຟູ ແລະ ໄຊຊະນະໃນການຕໍ່ສູ້ກູ້ຊາດຕ້ານພວກລ່າເມືອງຂຶ້ນຝຣັ່ງ ຂອງປະຊາຊົນ ຫວຽດນາມ, ລາວ ແລະ ກໍາປູເຈຍ ແມ່ນເປັນເທື່ອທໍາອິດທີ່ໄດ້ເຮັດໃຫ້ລັດທິລ່າເມືອງແບບເກົ່າຖືກພັງທະລາຍ ລົງຢູ່ໃນໂລກ, ໄຊຊະນະດັ່ງກ່າວຍັງເປັນບ່ອນອີງທີ່ຫນັກແຫນ້ນ, ທັງເປັນແວ່ນແຍງທີ່ໃສແຈ້ງໃຫ້ແກ່ບັນດາປະ ຊາຊາດທີ່ຕົກເປັນຫົວເມືອງຂຶ້ນ ໄດ້ລຸກຂຶ້ນຕໍ່ສູ້ຕ້ານກັບການກົດຂີ່ຂູດຮີດ ແລະ ແອກຄອບຄອງເມືອງຂຶ້ນແບບ ເກົ່າຢູ່ຫລາຍບ່ອນໃນທົ່ວໂລກ, ປະກອບສ່ວນອັນສົມກຽດເຂົ້າໃນພາລະກິດຕໍ່ສູ້ອັນຍິ່ງໃຫຍ່ຂອງມວນມະນຸດທີ ກ້າວຫນ້າເພື່ອສັນຕິພາບ, ເອກະລາດ, ປະຊາທິປະໄຕ ແລະ ຄວາມກ້າວຫນ້າຂອງສັງຄົມ...!  ສໍາລັບປະເທດລາວ ໄຊຊະນະດຽນບຽນຟູໄດ້ມີຄວາມສໍາຄັນໃນການສາມັກຄີພິເສດ, ຮ່ວມສໍາພັນສູ້ ຮົບລະຫວ່າງລາວ  ຫວຽດນາມ, ເປັນໄຊຊະນະຕ້ານສັດຕູຕົວດຽວກັນ, ປະສານສົມທົບ ແລະ ອຸດຫນູນຊຶ່ງກັນ ແລະ ກັນ ເພາະວ່າ ດຽນບຽນຟູ ຢູ່ໃກ້ໆກັບຜົ້ງສາລີ ແລະ ຫົວພັນ, ສະນັ້ນ ຕີຊະນະຝຣັ່ງຢູ່ດຽນບຽນຟູຈຶ່ງທັບ ມ້າງ ແຫລ່ງທີ່ຫມັ້ນສໍາຄັນ ຂອງສັດຕູ; ເລົ່າຫວນຄືນເຖິງຊີວິດ ແລະ ການເຄື່ອນໄຫວປະຕິວັດ ຂອງປະທ່ານໂຮ່ຈີ່ມິນ ໃນແຕ່ລະໄລຍະ, ໂດຍສະເພາະແມ່ນມູນເຊື້ອການເຄື່ອນໄຫວພາລະກິດປະຕິວັດອັນອົງອາດກ້າຫານ, ເດັດດ່ຽວຂອງປະທານໂຮ່ຈີ່ມິນ ຈົນກາຍເປັນນັກຮົບປະຕິວັດທີ່ຍິ່ງໃຫຍ່, ເປັນວິລະບູລຸດ ເປັນຜູ້ນຳທີ່ມີຄວາມສາມາດສະຫລາດສ່ອງໃສ, ເປັນນັກທິດສະດີ ແລະ ພຶດຕິກຳ, ເປັນນັກປຸກລະດົມຂົນຂວາຍ, ເປັນແບບຢ່າງທີ່ດີ ຂອງເພີ່ນ; ຍົກໃຫ້ເຫັນ ການກຳເນີດ ແລະ ການເຕີບໃຫຍ່ ຂອງອົງການຈັດຕັ້ັ້ງສະຫະພັນແມ່ຍິງລາວ ຕະຫຼອດເຖິງຜົນງານການເຄື່ອນໄຫວທີ່ພົ້ນເດັ່ນ ຂອງອົງການຈັດຕັ້ັ້ງສະຫະພັນແມ່ຍິງລາວໃນພາລະກິດຕໍ່ສູ້ປົດປ່ອຍຊາດ ໄລຍະປີ 1958-1975 ແລະ ການປະກອບສ່ວນຂອງແມ່ຍິງ ໃນພາລະກິດປົກປັກຮັກສາ ແລະ ສ້າງສາປະເທດຊາດ ໄລຍະປີ 1976 ຈົນເຖິງປະຈຸບັນ.

ຈາກນັ້ນ ໃນວາລະສຸດທ້າຍຂອງພິທີດັ່ງກ່າວ ທາງສະຫະພັນແມ່ຍິງ ຮາກຖານພະແນກຊັບພະຍາກອນທຳມະຊາດ ແລະ  ສິ່ງແວດລ້ອມແຂວງ ສະຫວັນນະເຂດ ກໍ່ໄດ້ເປີດຂະບວນການ ແຂ່ງຂັນ 3 ດີ ປະຈຳປີ 2023 ຂອງຕົນຂຶ້ນຢ່າງເປັນທາງການ.