ກ່ຽວກັບ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ

ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ ຂຽນຫຍໍ້ (ພຊສ) ສັງກັດ ໃນໂຄງປະກອບກົງຈັກ ພາຍໃຕ້ການຊີ້ນໍາໆພາ ແລະ ຄຸ້ມຄອງ ຂອງແຂວງ ທາງດ້ານຊີວິດການເມືອງ ແລະ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ທາງດ້ານວິຊາການ.  ແລະ ຖືກສ້າງຕັ້ງຂຶ້ນໃນວັນທີ 09 ມີນາ 2012 (ອີງຕາມຂໍ້ຕົກລົງ ສະບັບເລກທີ 1467/ກຊສ ລົງວັນທີ 09 ມີນາ 2012)  ໃນເບື້ອງໄລຍະນັ້ນມີພາລະບົດບາດເປັນເສນາທິການ ໃຫ້ແກ່ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ; ອົງການປົກຄອງແຂວງ ໃນການຄຸ້ມຄອງບໍລິຫານ, ປົກປັກຮັກສາ, ຟື້ນຟູບູ ລະນະ ກ່ຽວກັບ ສິ່ງແວດລ້ອມ, ຊັບພະຍາກອນດິນ, ປ່າໄມ້, ນ້ໍາ, ອາກາດ, ຊີວະນາໆພັນ, ແຮ່ທາດ ຕໍ່ໄປນີ້ເອີ້ນວ່າ: "ຊັບພະຍາກອນທໍາມະຊາດ ແລະ ສິ່ງແວດລ້ອມ" ລວມທັງວຽກງານ ການຄຸ້ມຄອງໄພພິບັດ ທໍາມະ ຊາດ, ການປ່ຽນແປງດິນຟ້າອາກາດ, ອຸຕຸນິຍົມ ແລະ ອຸທົກກະສາດ ໃນຂອບເຂດທ້ອງຖີ່ນຂອງຕົນ ປະກອບມີ 10 ຂະແໜງການ ຄື: ຂະແຫນງ ບໍລິຫານ, ແຜນການ ແລະ ການເງິນ; ຂະແຫນງ ຈັດຕັ້ງ ແລະ ກວດກາ; ຂະແຫນງ ຄຸ້ມຄອງທີ່ດິນ; ຂະແຫນງ ຈັດສັນ ແລະ ພັດທະນາທີ່ດິນ; ຂະແຫນງ ຊັບພະຍາກອນນ້ຳ;ຂະແຫນງ ຄຸ້ມຄອງຊັບພະຍາກອນປ່າໄມ້; ຂະແຫນງ ທໍລະນີສາດ ແລະ ແຮ່ທາດ; ຂະແຫນງ ສິ່ງແວດລ້ອມ; ຂະແຫນງ ອຸຕຸນິຍົມ ແລະ ອຸທົກກະສາດ ແລະ ຂະແຫນງ ຂໍ້ມູນຂ່າວສານ;

ມາຮອດວັນທີ 01 ສິງຫາ 2017 ໄດ້ມີການປັນປຸງ ໂຄງປະກອບກົງຈັກ ຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ຈາກ 10 ຂະແໜງການ ມາເປັນ 08 ຂະແໜງການ ຄື: ຂະແຫນງບໍລິຫານ ແລະ ການເງິນ; ຂະແຫນງແຜນການ - ສະຖິຕິ ແລະ ຂໍ້ມູນ-ຂ່າວສານ; ຂະແຫນງຈັດຕັ້ງ ແລະ ພະນັກງານ;ຂະແຫນງກວດກາ; ຂະແຫນງທີ່ດິນ; ຂະແຫນງຊັບພະຍາກອນນໍ້າ ແລະ ອຸຕຸນິຍົມ; ຂະແຫນງສິ່ງແວດລ້ອມ ແລະ ການປ່ຽນແປງດິນຟ້າອາກາດ; ຂະແຫນງຕິດຕາມກວດກາຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ມີພາລະບົດບາດເປັນເສນາທິການໃຫ້ແກ່ ກະຊວງຊັບພະຍາກອນ ທໍາມະຊາດ ແລະ ສິ່ງແວດລ້ອມ, ອົງການປົກຄອງແຂວງ, ນະຄອນຫຼວງ ໃນການຄຸ້ມຄອງບໍລິຫານ, ຄຸ້ມຄອງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຊຶ່ງປະກອບມີທີ່ດິນ, ນໍ້າ, ອາກາດ, ຊີວະນາໆພັນ, ສິ່ງແວດລ້ອມ ສັງຄົມ ແລະ ທໍາມະຊາດ ລວມທັງວຽກງານໄພພິບັດ ແລະ ການປ່ຽນແປງດິນຟ້າອາກາດ, ອຸຕຸນິຍົມ ແລະ ອຸທົກ ກະສາດ ໃນຂອບເຂດທ້ອງຖິ່ນຂອງຕົນ (ອີງຕາມຂໍ້ຕົກລົງ ສະບັບເລກທີ 3171/ກຊສ, ລົງວັນທີ 01 ສິງຫາ 2017);

 ມາຮອດວັນທີ 03 ພະຈິກ ປີ 2020 ໄດ້ມີການປັບປຸງໂຄງປະກອບ ຂົງເຂດວຽກງານຊັບພະຍາກອນ ທຳມະຊາດ ແລະ ສິ່ງແວດລ້ອມ ຂັ້ນທ້ອງຖິ່ນໃຫ້ ອີກເປັນເທື່ອທີ III ຕາມຂໍ້ຕົກລົງສະບັບເລກທີ 4983/ກຊສ ແລະ ມາຮອດຄັ້ງວັນທີ 27 ຕຸລາ 2021 ໄດ້ການປັບປຸງໂຄງປະກອບ ຂົງເຂດວຽກງານ ຊສ ຂັ້ນທ້ອງຖິ່ນອີກ ຈຶ່ງເຮັດໃຫ້ຮາກຖານພັກພະແນກຊັບພະຍາກອທໍາມະຊາດ ແລະ ສິ່ງແວດລ້ອມ ມີ 1 ຫ້ອງການ ແລະ 4 ຂະແໜງການຄື: ຫ້ອງການບໍລິຫານ, ແຜນການ ແລະ ການເງິນ; ຂະແໜງຈັດຕັ້ງ ແລະ ພະນັກງານ; ຂະແໜງ ກວດກາ; ຂະແໜງທີ່ດິນ ແລະ ຂະແໜງສິ່ງແວດລ້ອມ, ນໍ້າ, ອຸຕຸນິຍົມ ແລະ ອຸທົກກະສາດ; ໂດຍມີພາລະບົດບາດເປັນເສນາທິການໃຫ້ແກ່ ກະຊວງຊັບພະຍາ ກອນທໍາມະຊາດ ແລະ ສິ່ງແວດລ້ອມ, ອົງການປົກຄອງແຂວງ, ນະຄອນຫຼວງວຽງຈັນ ໃນການຄຸ້ມຄອງ ແລະ ນໍາໃຊ້ ໃນການຄຸ້ມຄອງ ຊັບພະຍາກອນທໍາມະຊາດ ໃຫ້ເກີດຜົນປະໂຫຍດສູງສຸດ ແລະ ມີຄວາມຍືນຍົງ, ປົກປັກຮັກສາສິ່ງແວດລ້ອມ ໃຫ້ມີຄຸນ ນະພາບດີ ວາງແຜນປ້ອງກັນ, ຮັບມືກັບຄວາມສ່ຽງຈາກການປ່ຽນແປງດິນຟ້າອາກາດ ແລະ ສະຫນອງຂໍ້ມູນອຸຕຸນິຍົມ ແລະ ອຸທົກກະສາດ ໃນຂອບເຂດທ້ອງຖິ່ນຕົນ.

ມາຮອດວັນທີ 27 ຕຸລາ ປີ 2021 ໄດ້ມີການປັບປຸງໂຄງປະກອບ ຂົງເຂດວຽກງານຊັບພະຍາກອນ ທຳມະຊາດ ແລະ ສິ່ງແວດລ້ອມແຂວງ ອີກເປັນທີ IV ຈາກເດີມມີ 1 ຫ້ອງການ ແລະ 4 ຂະແໜງການ ມາເປັນ 5 ຂະແໜງການ ຄື: ຂະແໜງ ບໍລິຫານ, ຈັດຕັ້ງ ແລະ ກວດກາ; ຂະແໜງ ທີ່ດິນ; ຂະແໜງ  ສິ່ງແວດລ້ອມແລະ ການປ່ຽນແປງດິນຟ້າອາກາດ; ຂະແໜງ  ຊັບພະຍາກອນນ້ຳ ແລະ ອຸຕຸນິຍົມ; ຂະແໜງ  ກວດກາຊັບພະຍາກອນ ທຳມະຊາດ ແລະ ສິ່ງແວດລ້ອມ  ໂດຍມີພາລະບົດບາດເປັນເສນາທິການ ໃຫ້ແກ່ ເຈົ້າແຂວງ, ເຈົ້າຄອງນະຄອນຫຼວງ ແລະ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໃນການ ຄຸ້ມຄອງ ແລະ ນໍາໃຊ້ຊັບພະຍາກອນທໍາມະຊາດ ໃຫ້ເກີດຜົນປະໂຫຍດສູງສຸດ ແລະ ມີຄວາມຍືນຍົງ, ປົກປັກຮັກສາສິ່ງແວດລ້ອມ ໃຫ້ມີຄຸນນະພາບດີ, ວາງແຜນປ້ອງກັນ ແລະ ຮັບມືກັບຄວາມສ່ຽງຈາກການປ່ຽນແປງດິນຟ້າອາກາດ, ສະ ຫນອງຂໍ້ມູນອຸຕຸນິຍົມ ແລະ ອຸທົກກະສາດ ໃນຂອບເຂດທ້ອງຖິ່ນຕົນ (ອີງຕາມຂໍ້ຕົກລົງ ສະບັບເລກທີ 5506/ກຊສ ລົງວັນທີ 27 ຕຸລາ ປີ 2021).